देणे

मोल ज्याचे करता न ये, माय-पित्याने जन्म दिला
वातीसारखे जळून, केले लहानग्याचे मोठे मला
शाळेमधल्या चिमण्या जगात आचार्यांनी पाठ दिला
‘कसे जगावे, कसे मरावे-’ अमरत्वाचा मंत्र दिला
घरामागच्या मैदानाने खूप खूप अपरूप दिले
नाना खेळ शिकवून त्याने चैतन्याचे पाट दिले
नित्यनूतन निसर्गदेवीने अमाप, अमाप दिले मला
जेव्हा आले डोळां पाणी- तिनेच तेव्हा धीर दिला
दात्यांचे ते हात पाहून लाज वाटते माझीच मला
काहीच नाही आपण दिले, फक्त त्याना ताप दिला...